Бир ғалати, ёмон, расво одатим бор

www.temuriylar.com

УЯТ! ЁЗУҚ!

Бир ғалати, ёмон, расво одатим бор. Шуни ташлашим керак. Энди бундай қилмайман дейману эсимдан чиқиб қолаверади. Ғалати хазил. Албатта буни кўнглим тортадиган, ўзимга яқин инсонларга қиламан, лекин барибир хунук одат. Масалан, яқин дўст ва жиянларим янги буюм, кўзойнакми, ручками олган бўлса секин қўлидан олиб “Хах бундан ўзингаям олмадингми?!
Ўзингаям олгин-да” деб чўнтагимга солволаман. Халиги бечара сўрагани хижолат бўлиб илжайиб “Ҳа майли, ҳа майли” деб қўяверади. Охирида халиги буюмни ё қайтариб бераман, ё эвазига бошқа нарса бераман, ё эсимдан чиқиб фаромуш қиламан. Кеча Ислом Мўмин деган бир қадрдон, қаламкаш ака олдимга кўргани келувди. Халиги кишида янги блокнот бор экан хазиллашиб қўлидан олиб “Хах бундан ўзингизгаям олмадингизми?! Ие, ўзингизгаям олишингиз керак эди” деб олиб қўйиб кейин “бир пасга ушлаб туринг” деб ўзига берувдим. Бошқа нарса билан чалғиб, файзбоғдамидим билмайман, ғафлатда қолибман. Халиги ғирт содда ака блокнотни ташлаб, кейин келаман деб кетиб қолибди. Блокнотини очиб қарасам бир четига “Шукуржон, ростан ҳам буни сизга олувдим” деб ёзиб қўйибди. Ўзига олгани аниқ-ку, лекин хурмача хазилнинг “меваси” бу. Ҳатто ўша пайти столимда тўртта блокнотим турувди. Бу худди юзта қўйли одам битта қўйли одамдан қўйини тортволишига ўхшайди. Шу акани таниганлар, мободо кўриб қолсангиз мени йўқлаётганимни айтиб қўйинглар! Бошқа ишим ҳам бор. Телефони ишламаяпти шекилли. Барибир бу расво одатни ташлашим керак. Ислоҳ қилишим керак...

Фейсбукдан Шукур Жаббор