Ашхободда Отамурот Ниёзов – Туркманистоннинг собиқ президенти Сапармурот Ниёзов (Туркманбоши)нинг отасига қўйилган ҳайкал олиб ташланди. Бу ҳақда «Туркманистон хроникалари» хабар бермоқда.
Монумент Чехов кўчаси ёнидаги хиёбонга ўрнатилган эди. У 2001 йили тантанали
равишда очилган, ҳайкалнинг очилишида президент Ниёзов ҳам иштирок этган эди.
Ҳайкални нима сабабдан олиб ташлашгани маълум қилинмаган. Нашрнинг қайд этишича, бир қатор маълумотларга кўра уни Қипчоқ қишлоғига кўчиришган – Ашхобод остонасидаги ушбу манзилгоҳ Туркманбошининг она қишлоғи ҳисобланади.
Отамурот Ниёзов Иккинчи жаҳон уруши вақтида ҳалок бўлган. СССР парчаланиб, Туркманистон ҳокимияти тепасига Сапармурот Ниёзов келганидан сўнг унинг отаси вафотидан сўнг Туркманистон қаҳрамони унвони билан тақдирланган эди. Туркманистон шарқидаги бир шаҳарга унинг номи берилган, 2004 йил эса Отамурот Ниёзов йили деб эълон қилинганди.
Сапармурот Ниёзов ўлимига қадар – 2006 йилгача Туркманистонга раҳбарлик қилган ва бу давр мобайнида мамлакатда унинг, шунингдек, унинг оила аъзолари шахсига сиғиниш шаклланганди.
Ҳокимият тепасига Гурбангули Бердимуҳамедов келганидан сўнг аввалги президент шахсига бўлган қизиқиш камайишни бошлади. Мамлакатда аввалги президент шарафига ўрнатилган ҳайкалларни олиб ташлаш бошланди, мактабларда эса бунгача «муқаддас китоб» мақомига эга бўлган Ниёзовнинг «Руҳнома» асарини ўқитиш тўхтатилди.
Шу билан бирга мамлакатда Бердимуҳамедов шахсига сиғиниш бошланди. Уни «Аркадаг» («Ҳомий») деб, унинг президентлик даврини эса «Куч-қудрат ва бахтиёрлик даври» деб аташ бошланди. Айни вақтда, 2012 йили Изгант қишлоғида (Ахал вилояти)да президент отаси Маликгули Бердимуҳамедовга ҳаётлигида ҳайкал қўйилди, аввалроқ эса Ашхободдаги ҳарбий қисмлардан бирига унинг номи берилган эди.
Комментариев нет:
Отправить комментарий