Андижонлик Ойбек Умаров ЭлектроМобиль ишлаб чикарди.....

Фан ва техника соҳасидаги ҳар қандай янгилик тезда омма эътиборига тушади. Андижонлик  Ойбек Умаровнинг янги русумдаги электромобиль ишлаб чиққани ҳақидаги овозани

эшитгач, 12news.uz янгиликлар агентлиги мухбири Элмурод Эрматов ёш ихтирочи  билан учрашди.

Андижон компьютер технологиялари касб-ҳунар коллежи битирувчиси бўлган Ойбек билан суҳбатлашганимизда ихтирочининг электромобилдан ташқари янги русумдаги уч ғилдиракли автоцикл ва скутер ишлаб чиққани бизни янада қувонтирди.

– Ҳаммаси оиламиз учун қулайлик яратишга мўлжалланган  оддий ва зарур бўлган техника воситасини йиғишдан бошланди, – дейди Ойбек. – Мактабда ўқиб юрган пайтларимдан дадам Тўлқинжон Умаровдан электроника сирларини ўрганганман. Барча ўзбек оилалари сингари бизникида ҳам ун, ёғ ва турли керакли сабзавотларни бозордан қопда олиб келиб ғамланади. Мана шундай кундалик юмушларни олиб келиш учун оиламизга қулай камчиқим бўлган транспорт  воситасини йиғиш фикри туғилгач, дам олиш кунлари уйимиздаги устахонада уч ғилдиракли спорт автоциклини яратдим.

Қарангки, шундан сўнг ўз иши самарасини кўриб илҳомланган 25 ёшли йигит иккинчи ишга қўл урибди. Унинг иккинчи ихтироси – скутер транспортини модернизацияси бўлди.  Ойбек ҳозирги ёшларимиз ўртасида урф бўлган скутерни ўзимизнинг иқлимга мослаштириб, дала жойларга сайрга чиққанда муаммо туғдирмаслиги яъни  чанг, қум, лой кабилар кириб кетмаслиги учун карбюраторни тескари жойлаштиргани ижобий натижа берди.

Ёш ихтирочи ўз ишлаб чиққан техникалари тўғрисида шундай дейди: «Скутернинг янги русумини Андижон кўчаларида синаш учун миниб юрганимда, янги техникам кўпчиликнинг эътиборини тортди. Навбатдаги ишим электромобиль яратиш бўлди. Бунинг учун асосан бозорда сотиладиган материаллардан фойдаландим. Ё-мобилни асосий қисмларини оддий труба ва швейлерлардан ясаб, сирти, яъни корпусини тиклашда пластмассадан фойдаландим. Инсон бир ишга кўнгил қўйса, бошқа ҳунарларни ҳам ўрганиб олар экан. Бозордан пайвандлаш ускунаси сотиб олиб, техниканинг барча асосий қисмларини ўзим йиғдим. Оддий электр розеткасидан манбаа йиғадиган электромобилим 2 соатда тўйинади. Бир марта электр токига тўйинган электромобил 120 километр йўл босиб, тезлиги соатига 40-45 километрни ташкил этяпти. Электромобилни олд капотига қалдирғоч расмини чизиб, моделга “Қалдирғоч” деб ном қўйдим”.

Яратган моделларига буюртмалар туша бошлагач, ишлаб чиқаришни йўлга қўйиш учун  Ойбек барча чизмаларни олиб, Тошкентга патент олиш учун йўл олади.