Милиция ходимлари Daryo.Uz интернет-нашри ходимига Жасорат монументини ювиш жараёнини суратга олишга рухсат беришмаган. Бу ҳақда интернет-нашрнинг ўзи хабар тарқатган.
Воқеа 13 май куни содир бўлган, «Нима сабабдан Жасорат монументини суратга олиш мумкин эмас?» номли хабар эса Daryo.Uz’да 14 май куни чоп этилган.
Хабарда ёзилишича, монумент ювилаётганини кўрган интернет-нашр ходими жараённи суратга олишга интилган. «Бир неча дақиқа ўтар-ўтмай, у тўрт милиционер қуршовида уларнинг саволларига жавоб бераётган эди», – деб ёзади Daryo.Uz.
Милиционерларнинг сўзларига кўра, монументни суратга олиш учун шаҳар ҳокимлигидан рухсат олиш керак бўлган. Эътиборли томони, 1966 йили содир бўлган Тошкент зилзиласи қурбонлари хотирасига
ўрнатилган монумент олдида деярли ҳар куни ёш келин-куёвлар, шунингдек, Тошкентга саёҳатга келган хорижлик меҳмонлар суратга тушишади.
«[Милиционерлар] [мухбирдан] фотоаппаратни беришни талаб қилишар, расмларни ўчириб ташламоқчи бўлишарди», деб ёзади интернет-нашр. Қўшимча қилинишича, нима учун расмга олиш мумкин эмаслигини аниқ тушунтириб бера олишмаган.
Аввалроқ, Gazeta.Uz интернет-нашри Тошкент вилояти ҳокимлиги биносини суратга олиш вақтида мухбири милиционерларнинг саволлари остида қолганини маълум қилиб, бу каби ҳолатлар кўп содир бўлишини қайд этиб ўтган эди.
Комментариев нет:
Отправить комментарий