Гулнора Каримова АҚШ давлат котиби ёрдамчиси Майк Хаммерни қаерга олиб кетди?

Ўзини Ўзбекистоннинг бўлажак қироличасига менгзаётган Гулнора Каримова АҚШ давлат котиби ёрдамчиси Майк Хаммерни қаерга олиб кетди?
Бир ҳамкасбим билан пойтахтимиздаги Туркистон саройида АҚШ элчихонаси томонидан ўтказилган концертга бордик. Концерт Америкадаги дунёга машҳур I laminate гуруҳининг Ўзбекистонга илк бор келиши муносабати билан ўтказилаётган бўлиб, унга асосан ёшлар таклиф этилганди.
- Таклифномалар жуда кам қолган, чунки уларнинг ярмини Гулнора Каримова Фонд Форум учун олиб қўйган, - деди залда ўтирганлардан бири.
Ёшим ўтгани учунми, бу тадбирда ўзимни ортиқчадек ҳис қилдим. Тўғри, I laminate гуруҳининг чиқиши мени бефарқ қолдирмади. Гуруҳ аъзоларининг махсус чироқлари билан безатилган кийимлари, мусиқа остида, рақсга ҳамоҳанг ана шу чироқларнинг ўчиб ёниши концертга келган катта-ю кичикка бирдек ёқди. Ёшларнинг гулдурос қарсаклари-ю, қизғин олқишлари бундан яққол дарак берарди. АҚШ элчихонаси ўзининг бу галги тадбири билан яна бир бор томошабинларга бир олам завқ бағишлади, бу

сўзсиз аниқ.
Бироқ, Фонд форумнинг раҳнамолигидаги Злотников гуруҳи аъзоларининг чиқиши концертнинг белига тепди. Гулнора Каримованинг маслаҳатига кўра саҳналаштирилган рақслардан тўғриси, кайфиятим жуда хира бўлди. Баданига чиппа ёпишган кийимларда чиққан ёш раққос ва раққоссаларнинг нотабиий ҳаракати, тўғриcи, бачкана жилпанглаши кўп қатори менга ҳам ёқмади. Миллий урф-одатларимизга мос бўлмаган хатти-ҳаракатлар, ўта бачкана қилиқлар, тағин қизларнинг атласданми, адрасданми нусха олинган “иштонлари", (адашмасам, буни ёшлар “лосини” дейишади, буни миллатимизга ҳақорат сифатида қабул қилдим) таъбимни тирриқ қилди.
Орқа ўриндиқда ўтирган ёшлардан бири буни кўриб, бу гуруҳнинг чиқишини қизғин олқишлаётган тенгдошларидан фарқли ўлароқ:
- Ҳа, агар Гулнора Каримова Ўзбекистонга президент бўлса, мамлакатимиз бузуқлар мамлакати бўлади-қолади, ватанимиз фоҳишаҳонага айланади, - деганида донг қотиб қолдим.
Вой, шоввоз-ей, ёши 25 га ҳам бормаган бу йигитчага ўхшаган йигит-қизларни ўз томонига оғдириш учун Каримова хоним қанчадан-қанча тадбиркорларни қақшатиб, турли тадбирларни ўтказмоқда, грантлар, стипендиялар ажратиб, унга ўхшаган ёшларни қўллаб-қувватламоқда. Бундай “ўзига хос”, узоқни кўзлаб амалга оширилаётган имтиёзлардан ўша йигитча ҳам фойдаланмоқда. Ахир у тадбирга ўз-ўзидан келмаган-у! Эҳтимол, у элчихона таклифига кўра концертга келгани учун шундай эркин фикрлаётгандир.
Ёшларимиз орасида ана шундай эркин ва энг муҳими тўғри фикрловчилар борлигидан хурсанд бўлдим. Ана у жилпангловчиларнинг бемаза ва бачкана ҳаракатлари ёдимдан кўтарилиб ҳам кетди. Чунки яна саҳнада I laminate гуруҳи чиққан эди.
Ишхонада ҳамкасбларимдан бири сўзлаб берган воқеа ёдимга тушди. У ҳам буни кимдандир эшитган экан:
- Бир киши милиция участкаси нозирига иши тушиб, унинг олдига борибди. Борса, тўполон, жанжал. Бир аёл оғзидан боди чиқиб, милиция участкасини бошига кўтараётганмиш, диққат билан уларнинг суҳбатига қулоқ солса, бу аёлнинг ўз уйида фоҳишахона очгани, нозир буни аниқлаб, уни чақиртирганини тушунибди. Бироз кутиб турса, ундан ҳам даҳшатли гап сўзларни эшитиб, донг қотиб қолибди. “Мама роза”: - Менга ҳеч нарса қила олмайсан! Қамамоқчи бўлсанг, аввал Президентнинг қизларини қамагин. Улар ўзларининг фоҳишахоналарига махсус самолёт рейсида бир гуруҳ хорижлик бизнесменларни олиб келишади. Ўша бизнесменлар кўнгилхушлик қилганидан сўнг, келган самолётида яна юртига қайтиб кетади. Аввал ана ўшаларни қамагин!!!”, дея дағ даға қилган экан ўша аёл.
Бундай дўқ-пўписадан бечора участка нозири донг қотиб, ҳеч нарса деёлмабди. Бу гапдан менинг ҳам капалагим учиб кетди”.
Яқинда МХХ томонидан Президент Ислом Каримовга унинг қизи Гулнора Каримованинг “бемаза қилиқлари” тасвирга туширилган видеокассета тақдим қилинганида ота ва қизи ўртасида гап қочибди. Президент оиласида катта жанжал бўлибди, Президент ҳам оддий инсон, у осмондан ёки ойдан тушгани йўқ, жанжал бўлиши табиий ҳол, дерсиз. Аммо, бундан олдин ҳам Гулнора Каримованинг бир жойда стриптиз уюштириб туриши, ўзбекчасига айтганда уст-бошини ечиб туриши ҳақида эшитгандим. Балки Ислом Каримовга ўша кассетани тақдим қилишгандир? ЎХҲ росса бонг урган инфаркт ҳам ўшанинг оқибати бўлса керак, фақат бу тахмин, яна аслида нималар содир бўлгани ёлғиз Худога аён.
Бир сафар, Гулнора турмуш қурган йиллари унинг олдига эри келган. Лекин айни ўша дамда Гулнора Алишер Мадумаровнинг қучоғида бўлгани учун қўриқчилар президент куёвини унинг олдига киритишмаган. Гулноранинг бузуқ ҳаётига доир бундай мисолларни кўплаб келтириш мумкин.
Туркия каналларида унинг ана шундай “...” ичидаги ҳаётига доир лавҳа намойиш этилганидан сўнг, туркиялик тадбиркорлар Ўзбекистондан бадарға қилингани, уларнинг мол-мулки давлат фойдасига ўтказилганидан бугун бутун дунё бирдек хабардор.
Хуллас, Гулнора ўзининг бадхулқлиги туфайли отасининг узоқни кўзлаб, амалга оширган режасини чиппакка чиқарди. Ахир, ота айнан унинг президент бўлишини ўйлаб, 2004 йилдан бошлаб Ўзбекистон хотин-қизларига эҳ-ей, қанчадан-қанча имтиёзларни берди. Сенатор аёллар, депутат хотин-қизлар сони кўпайди. Бизнес соҳасида уларнинг сафи қанчалик кенгайганига ҳам бугун барчамиз гувоҳ бўлиб турибмиз. Бунга эришиш осон бўлмади, албатта.
I laminate гуруҳининг концертидан сўнг барча чиқиб кетишига қарамасдан, икки аёлнинг кимнидир кутаётганига кўзим тушди. Улар АҚШ элчихонаси вакили билан гаплашаётган экан, йўл- йўлакай қизиқиб, уларнинг суҳбатига қулоқ тутдим.
- Мен Майк Хаммер билан учрашишим керак, саволлар танловида биринчи ўринни олгандим, - деди аёллардан бири.
- Биласизми, ҳозир Гулнора Каримова тўсатдан келиб қолди ва Майк Хаммерни олиб кетди. Хоҳласангиз кутинг. Келиб қолиши мумкин, - деди унга элчихона вакили.
- Менимча, энди кутишнинг фойдаси йўқ, улар келишмаса керак, - деди иккинчи аёл.
Мен индамасдан нари кетдим, суҳбатнинг қандай якунланганини билмайман. Лекин журналист сифатида Гулнора Каримова Майк Хаммерни қаерга олиб кетгани мени жуда қизиқтириб қолди. Бир даврада Ислом Каримовдан кейин Ўзбекистонга Рустам Азимов президент этиб тайинланиши ҳақида гап-сўз бўлганди. Даврада ўтирганлар шу қарорга келинганидан сўнг ота ва қиз ўртасида катта жанжал бўлгани ҳақида ҳам айтишганди.
Афтидан Каримова хоним, АҚШ Давлат котиби Майк Хаммернинг Ўзбекистонга қилинган ташрифидан оқилона фойдаланиш учун отни қамчиламоқчи бўлганга ўхшайди. У қандай бўлмасин, ўз мақсадига эришмоқчи, шекилли. Тўғри, унинг саховати туфайли катта ютуқларга эришаётган ёшлар 2014 йил ўтказиладиган президентлик сайловларида унга овоз беришлари мумкин. Бироқ, катта ёшдагилар унга овоз бермасликлари аниқ.
- Мен кекса отахонлар билан суҳбатлашгандим, улар Ўзбекистонга аёл киши ҳеч қачон бош бўла олмайди. Бу мумкин эмас, деб таъкидлашган эди, - деганди водийлик бир ҳамкасбим.
- Ўзбекистонга тошкентлик ва водийликлар ҳеч қачон президент этиб тайинланмайди, - деган эди МХХ га ишлайдиган бир киши.
Қизик, бу фикрларни билдирган инсонлар қаердан бундай хулосага келишди? Нимага асосланиб, бундай фикр билдиришаяпти? Савол кетидан савол туғилаверади.
Эртага нима бўлишини ҳеч биримиз билмаймиз. Аммо, мени юқоридаги саволлар билан бирга яна бир савол анча пайтгача қийнаб юриши аниқ! Гулнора Каримова АҚШ Давлат котиб ёрдамчиси Майк Хаммерни қаерга олиб кетди экан?!

Анвар БОЗОР.