Плюрализм-ми ?

"Ижтимоий фикр" Маркази ўтказган ва ўтказаётган сўровлар ва сўров натижаларига муносабатим юмшоқ қилиб айтганда унча силлиқ эмас.

Гап сўров саволларидаги мужмаллик, риторика - савол йўналишидаги жавобнинг кафолатланганлиги ва кўзга яққол ташланадиган буюртма оҳангида ҳам эмас.

Марказ сўровлар натижаларини эълон қилар экан, бирон марта сўров буюртмачиси ким, унда қанча респондент қатнашди, уларнинг ижтимоий/жинсий/молиявий/ҳудудий таркиби қандай, сўров қаерда ва қанча муддат давомида амалга оширилди, сўров натижаларининг респондентлик даражаси қандай, хатолик эҳтимоли мавжудми каби социология учун жуда муҳим мезонларни очиқламаган. Бундан кейин ҳам очиқламаса керак.

"Ижтимоий сўров" Маркази амалга ошираётган сўровларнинг натижаларига шубҳа қилмаслигим ҳақида олдин ҳам ёзганман, чунки буни ўз шахсий тажрибамда бир неча бор синаб амин бўлганман, ўзим вақти-вақти билан ҳафтасига камида бир марта мулоқотда бўладиган танишларим орасида кичик сўровлар ўтказиб тураман.

Бугун шахсий сўровларимнинг сўнггиси ҳақида Сизлар билан ўртоқлашмоқчиман.

Шу йил Апрель ойининг 15- санасидан майнинг 6- санасига қадар "Сиз учун энг олий 3 қадрият нима?" саволи билан танишларимга мурожаат қилдим. Сўровимда 67 киши иштирок этди. Уларнинг 39 таси олий маълумотли, 51 таси эркак, 16 таси аёл, 28 таси Тошкент шаҳар пропискасига эга, қолганлари вилоятлардан. Сўралганларнинг ўртача ёши 29 ёш.

Натижаларга келсак, қадриятлар масаласида биринчи учталик қуйидагича тақсимланди:

1. Оила/ота-она/фарзандлар - 42 та жавоб 3 таликка кирган;

2. Соғлик - 38 та жавоб;

3. Молия/пул - 27 та жавоб.

Жавобларда яна "Ватан" ва "Тинчлик" қадриятлари ҳам кўп марта такрорланган.

Мен кутган "эркинлик" калимаси жавобларда атиги 3 марта қайд этилди. Шунингдек, 67 та танишимнинг биронтаси "Инсон ҳуқуқи"ни энг олий қадриятлар сафига қўшмаслигини ҳам билиб олдим.

Мана шунақа гаплар. Ҳоҳ ишонинг, Ҳох ишонманг.

Познер айтганидек, "Вот такие времена, господа!"