Нима учун ёлғончиларни кўкка кўтариб, рост сўзловчиларга тўқмоқ ўқталамиз?..

Ўртоқ Тютюринни танимаган инсон бўлмаса керак орамизда. Жуда ҳам қизиқ персонаж.

Ундан ҳам қизиғи – ҳаётда ҳам худди шундай шахс билан таниш эканлигим. Содда, беғубор, энг муҳими, ёлғон гапиришни билмайди. Билса ҳам, эплай олмайди.

Хоҳ ишонинг, хоҳ ишонманг, жаҳоннинг энг машҳур кино ва спорт юлдузлари билан бирга
эсдалик учун суратга ҳам тушган. У билан шундай воқеалар содир бўладики, айтсангиз, биров ишонмайди. Ҳаётининг ўзи бир кино унинг.

Лекин нима учундир унга ҳеч ким ишонмайди, ишонишни истамайди. “Бўлиши мумкин эмас, алдама”, – дейишади бамайлихотир.

Менинг эса жаҳлим чиқади. Нима учун шунақа? Қаёқдаги ёлғон-алдовларга рўю рост ишониб, туҳмату бўҳтонга қурилган маълумотларни бош билан тасдиқлаб, асоси йўқ сафсаталарни беҳижолат қабул қиламиз-у, рост гапни ҳеч бўлмаса инкор қилмасликка қурбимиз етмайди.

Ҳаётимизни ёлғонлар устига қурганимиз эмасми бунинг сабаби? Рост сўзни гўёки қоп-қора сочларимиз орасига оралаган оқ толадек хавотир билан, истамайгина қабул қиламиз. Гўёки шундай қилсак, оқ тола ўз-ўзидан йўқолиб қоладигандек.

Бировга ақл ўргатиш фикридан йироқман, чунки ўзим ақлга муҳтожман. Англамоқчи бўлганим, жавоб излаганим – бор-йўғи оддий бир савол: нима учун ёлғончиларни кўкка кўтариб, рост сўзловчиларга тўқмоқ ўқталамиз?..