ўзбек футболчилари ватанни тарк этишни бошлаб юборишган

"Бунёдкор" клуби ярим ҳимоячиси Фозил Мусаевнинг Қатарга йўл олишини мухлислар турлича қабул қилишмоқда.

Кимдир футболчи учун қувониб, унга омад тиласа, бошқалар Фозил Россия ёки Украина клубларига лойиқ эди деб, ўйинчи қабул қилган қарордан кескин норози ва буни интернет саҳифаларида қолдиришмоқда.

Умуман, ўзбек футболчилари Форс кўрфази тарафларга кетишган бундан аввалги маҳалларда ҳам мухлислар буни кўпинча салбийликка йўйишган...

Бизнинг футболчиларни нега Россия ва Украинага сурункали тарзда чақиришмай қўйди? Бунинг сабаблари нимада?

Биз ушбу мавзуда россиялик таниқли агент Олег Малежикка мурожаат қилдик. Маълумот ўрнида шуни айтиб ўтиш керакки, суҳбатдошимизнинг мижозлари қаторига бугунда Россия миллий терма жамоасининг потенциал номзодлари - Сергей Бризгалов (“Спартак” М), Игорь Смольников (“Краснодар”), Эмин Маҳмудов (“Крилья Советов”) каби футболчилар киради.

- Олег, чиндан ҳам, нега бизнинг ўйинчиларга эътибор сусайиб кетган?
- Россия клубларида ҳозир пул жуда катта. Шунинг учун улар айни даврда ўз нигоҳларини Европа ва Лотин Америкаси бозорига қаратишган.

- У регионлардаги футболчиларнинг трансфер нархлари баланд ҳисобланади. Ахир қимматга футболчи сотиб олиб, катта ҳаражат қилгандан кўра, биздан ўйинчиларни арзонроққа олиб, Россия клублари ўз пулларини тежаганлари яхши эмасми?
- Йўқ. Клубларни пулни иқтисод қилиш эмас, муваффақиятли натижага эришиш биринчи навбатда қизиқтиради. Ўзбек футболчилари савиясини олайлик. Кескин фикр билдиришимга ҳафа бўлмайсиз, деган умиддаман. Мисол учун, ўтган мавсумда аутсайдер “Алания”да ҳам мустаҳкам ўрин эгаллай олмаган Санжар Турсунов сизларда 2012 йилнинг энг яхши футболчиси деб топилди. Бундан ўзингиз тегишли хулоса чиқариб олаверинг.

Тўғри, Ўзбекистонда ҳозир яхшигина янги авлод етишиб чиқмоқда. Ўсмирлар ва ёшлар терма жамоаларингизни назарда тутяпман. Эртами-кечми, Туркиядаги ЖЧда қатнашган йигитлардан иккита-учтаси премьер-лигамизда пайдо бўлса ажабланмайман.

- Маҳоратли футболчиларимиз Форс кўрфази давлатларига йўл олишлари юзасидан нима дея оласиз?
- Ўзбекистон – Осиё футбол конфедерацияси вакили. Барча клубларингиз ва терма жамоаларингиз Осиёда тўп суришади. Шу тариқа сизларнинг футболдаги муносабатларингиз Осиё мамлакатлари билан олиб борилади. Яъни ўзбек футболчилари савияси ва даражасини ўша БАА, Қатар, Саудия Арабистонида бевосита билишади. Шунинг учун ҳам ўйинчиларингизнинг ўша региондан тез-тез таклиф олиб туришлари – бу табиий ҳол.

Аммо Россия ва Европа футболининг рейтинги Форс кўрфази билан таққослаб бўлмайдиган даражада. Мени маъзур тутасиз-у, мухлисларингизга ўз кучларингизни меъёридан ортиқча баҳоламанг, деган бўлардим. Ҳа, Ўзбекистон жамоалари Осиёда секин-аста катта натижаларга эришишмоқда. Аммо жаҳон миқёсида ҳозирча ҳеч қандай оламшумул натижангиз йўқ.

- Одил Аҳмедов “Анжи”га ўтишга эришди-ку?! Бунга нима дейсиз?
- Аҳмедов – бу ягона истисно. Анъанавий жараён эмас. Бир йил олдин у, менимча, РФПЛдаги энг яхши учта таянч ярим ҳимоячилардан бири эди. У ҳақида ОАВда ҳам кўп ва хўп бонг урилди. Лекин жорий мавсумда таркибга кириш унга анча қийин кечади. Лассана Диарра, Игорь Денисов каби футболчилар билан рақобат олиб бориш Одилга осон бўлмайди. Бироқ, иккиланишсиз айтишим мумкинки, премьер-лиганинг 16та клубидан 13-14таси Аҳмедовни ўз сафларида кўришни исташган бўларди.

- Наҳотки бизнинг бошқа футболчилар РФПЛда тортиб кетишолмайди?
- Мен сизларда кўплаб футболчилар билан ишлайдиган агент Санъат Шариповни яхши биламан. У билан Лондондаги семинарда кўришганимизда, у менга Ф.Мусаев, И.Тўхтахўжаев, Ж.Ҳасанов (“Бунёдкор”), А.Шораҳмедов, Д.Раҳматуллаев каби футболчиларни Россия клублари учун тавсия қилди. Биз кейинчалик бирга Москвада “Терек”, “Кубань” ва бошқа клублар мураббийлари ва спорт директорлари билан учрашдик. Биласизми, улар футболчиларингизни ҳатто кўрикка ҳам чақиришга қизиқишмаяпти. Бундан ташқари, таклифларимизга 1-дивизион жамоалари ҳам совуқ муносабат билдиришди.

Кейин мен Санъатдан олган видеоматериалларни Сербия, Польша, Венгриядаги клублар ва мутахассисларга етказдим. Бироқ уларда ҳам ўзбек клублари ва футболчилари илиқ таассурот қолдиришмади. Миллий чемпионатингиз ўйинларини бу экспертлар зерикарли, паст тезликда кечадиган, ўйинчилар кўп бракларга йўл қўядиган экан деб баҳолашибди. Ўзим ҳам кўриб чиққан ДВД-дисклардан гувоҳ бўлдимки, стадионларингиз деярли бўм-бўш. Демак, учрашувлар, улардаги кураш, футболчиларнинг ҳаракатлари мухлисларни ўзига тортмайди.

манба уфф.уз