Медицинага Алохида Эьтибор Каратилган ва Камчиликлар йук деган эди И Каримов..Хаётдачи ???

www.milliyburch.com

Ўтган бир йил мобайнида ўз бошимдан ўтказганларим ва гувоҳи бўлганларим, кузатганларим сизни ҳам мулоҳазага чорласа ажаб эмас.
Ота-оналар фарзандига ҳамма нарсанинг энг яхшисини муносиб кўради. Ноз-неъматларнинг ҳам, кийим-кечак, ўйинчоғу
қўғирчоқларнинг ҳам энг "тоза"сини боласига илинади. "Емай едиради, киймай кийдиради", деган ибора бекорга айтилмаган-да. Хуллас, катта орзу-ҳавас билан вояга етказаётган дилбандингиз нохос касал бўлиб қолса нима қиласиз? Табиийки, оқ либос эгалари яккаю ягона нажоткорингизга айланади. Дўхтирнинг ҳар бир сўзига бешак амал қилиб, буюрган неки дори-дармони бўлса, топиб келасиз, айтганини муҳайё қиласиз, шундай эмасми? Аммо айрим шифокорлар мана шундай ҳурматни суиистеъмол қилишмаяптимикин? Нима гап экан, деб ҳушёр тортдингиз-а, муҳтарам ўқувчи? Бўлмаса эшитинг. Ўтган бир йил мобайнида ўз бошимдан ўтказганларим ва гувоҳи бўлганларим, кузатганларим сизни ҳам мулоҳазага чорласа ажаб эмас.

Фарзандим 6 ойлигида қаттиқ шамоллаб қолди. Турли турдаги дорилар кор қилавермагач, поликлиникамиз шифокорлари «Цефтриаксон» деган уколни буюришди. Уч кунлик муолажадан сўнг боламнинг соғлиги яхшиланди. Биз ёш ота-онанинг дўхтир опамиздан беҳад миннатдорлигимизни кўрсангизэди! Ахир неча кунки юзида қувонч нишонаси кўринмаган гўдагимиз опанинг «аччиқ» уколи туфайли яна қиқир-қиқир кула бошлади. Ҳа, ота бўлганингда отанг қадрини, она бўлганингда онанг қадрини биласан, деганлари рост экан. Бола улғайтириш биз каби тажрибасиз ёшлар учун осон эмас.

Орадан уч-тўрт ой ўтар-ўтмас фарзандимиз яна иситмалади. Бу сафар тез ёрдам машинаси кўмакка келди. Палата шифокори хонага киргач, аввал қандай дори-уколлар олганимизни суриштирди. Олган антибиотикларимизни номма-ном айтдим. Дўхтир хола жуда муҳим нарсани тушунтиришга чоғланган кишидай чимирилди: «Ҳм, сизлар олган инъексия Ўзбекистонники, мана бу мен ёзиб бера ётганим Россияники, бунинг самараси яхшироқ. Шуни топиб келинглар», деб ҳатто топиш мумкин бўлган дорихона манзилини ҳам айтди. Биз меҳрибон дадамизга дўхтирнинг гапини ипидан игнасигача етказдик ва «зўри шу екан», деб ҳам қўйдик. Бироз вақт ўтгач, дори-дармонларни харид қилиб қайтган турмуш ўртоғим бу укол олдингисидан анчагина қиммат эканини қистириб ўтди. Ана шу қиммат дорининг қутисини шумтака ўғлим ўйнаб-ўйнаб йиртиб қўйди. Ҳамма гап шундан кейин бошланди.

Қутисиз ампулани олиб, ҳамшира ҳузурига бордик. У қутини сўради. Мен айбдорона бош эгдим: «Болам йиртиб қўйди...».
У эса дори қутиларининг бир бурчидан йиртиб олинган қоғозларга тўла пакетини кўрсатди: «Биз бунинг серия рақамини касаллик варақангизга ёзишимиз керак». Мен ҳайрон бўлдим: серия рақами уколнинг шиша идишида ҳам борку. Касалхонадан чиқар эканмиз, шифокорларга «алоҳида раҳмат»имизни айтиб, уйга қайтдик. Буни қарангки, қувончимиз узоққа чўзилмади. Вужуди нозиккина ўғлимиз яна бояги касалликдан азият чека бошлади. Ноилож иккинчи марта шифохонада даволанишимизга тўғри келди.

Табиб табиб эмас, бошидан ўтказган табиб, дея бекорга айтишмаган экан. Дори-уколларнинг номини эшитаверганимиздан улар ёд бўлиб кетди. Аммо бу сафар ўғлимга шифокор буюрган уколнинг номи бизни ажаблантирди: «Базит» эмас, «Сефтриаксон» эмас, «Сефаксон». Дўхтир опа тушунтирди: «Сизлар Ўзбекистонникини, Россияникини бекорга ишлатибсизлар, уларнинг самараси кам.
Бунинг фақат Украинада ишлаб чиқарилганини олинглар». Шу жойига келганда менинг жиззакилигим тутди: «Ахир арзонгина Ўзбекистоннинг уколини олганимизда ҳам анча вақтгача касал бўлмай юрувдик-ку». Бу гапимга жавобан у шундай деди: «Арзон молга учманг, қизим, қимматнинг ҳикмати бўлади. Эрингизга айтинг, шуни олиб келсин». Хуллас, бу сафар эрим чўнтагини қуп-қуруққилиб, уколларнинг «энг зўри»ни олиб келди. Бу гал ҳам нуқул дори қути ўйнайдиган ўғлимдан қутиларни тортиб олаверишди. Мен эса бунга тушунмай ҳайрон эдим. Ҳа, бу саргузаштлар йил давомида шу тарзда бир неча марта бўлиб ўтди. Ўғлимизнинг соғлиги ўнгланиб кетди. Аммо мен ҳар сафар шаҳримизнинг барча кўчаларида уч-тўртталаб 24 соат давомида халқимизга беминнат хизмат кўрсатиб келаётган дорихоналар ёнидан ўтарканман, дори эмас, дори қутиларидаги сир ҳақида ўйлайман. Ниҳоят, бу тилсимни очишга муваффақ бўлдим чоғи. Қандай қилиб дейсизми?

Яқинда маҳалламиздаги поликлиникада тиббий кўрикдан ўтишимга тўғри келди. Аёллар шифокори хонасидаги навбатдан жой олдим. Бекорчиликдан атрофимдаги хотин-қизларни кузатаман. Нохос уларнинг қўлида оқ селофанга солинган бир хил - қутисида «Пео» деб ёзилган дорими, уколми ушлаб тургани диққатимни тортди. Қизиқ, уларнинг ҳаммаси бир хил дардга чалинганми деб ўйлаб қолдим. Шу фикр хаёлимни банд этди. Нега? Навбатим келиб ичкарига кирдим, шифокоримиз арз-додимни эшитгач, менга дори-дармонлар ёзилган қоғозни узатди. Уни қўлимга олдим. Не кўз билан кўрайки, менга ҳам «Пео» буюрилган. Тўғридан-тўғри дўхтирнинг ўзидан бунинг сирини сўрадим. У қошини бир чимириб қўйдию, бу енг зўри эканини айтди. На илож, саломатлик керак бўлса, энг яхшисини оласан-да! Дорихонага кириб боягини сўрадим. Сотувчи аёл истеҳзоли кулди-ю, бу атрофдаги дорихоналарда қолмаганини узоқроқдагиларидан қидиришимни айтди.

Унинг сирли кулгиси туртки бўлди. Мен ҳам кулибгина пичинг қилдим: «Чиндан зўр дори экан-да, қаранг, камёблигини». Дорихоначи опа кўнглидагини яширолмади: «Қанақасига зўр бўларкан. Ўзимизда ишлаб чиқарилган мана бу дори билан таркиби бир хил. Фарқли жиҳати, бу ундан олти баробар арзон. Тушундингизми?» Мен эса тушунмадим: «Унда нега шифокор айнан шу дорини топиб келишимни буюрди?!» «Чунки, - гапида давом этди дорихоначи. - Ўша шифокор бу компаниянинг Ўзбекистондаги ваколатхонаси билан ҳамкорлик қилади. Яъни унга ҳар бир дори қутисидаги серия номери учун маълум миқдорда мукофот берилади. Тушундингизми?» Бу аёлнинг мен ва мен кабиларнинг гўллигидан хуноби ошиб кетган, шекилли, яна давом этди: «Нафақат сиз сўраганингиз, балки бошқа кўплаб дорилар ўзимизда ҳам ишлаб чиқарилади. Таъсири чет элникидан кам эмас. Аммо шифокорларимизнинг рецепти бўйича беморлар хорижнинг қимматдан-қиммат дорисини харид қилишаяпти».

Ҳа, мен тушундим, аммо ишонмадим. Гарчи фарзандим билан боғлиқ саргузаштлар туфайли бунга кўп бора гувоҳ бўлган эсамда, юртимизда ишлаб чиқарилган боягининг эгизагини олдиму, шифокоримга учрадим. У эса норози қиёфада нега буни олганимни сўради. Мен унинг ёзиб бергани қимматлигини, ўша билан бир хил таркибли бу инъексия арзонроқэканини айтдим. Дўхтирнинг хатти-ҳаракатлари, гап-сўзларидан бу қилиғим унга ёқмагани сезиларди. Ахир унинг дори қутига тўла халтасига яна бири қўшилиши мумкин эди-я. Бу қутиларнинг ортида биттадан инсон, унинг соғлиги-ю, ҳамёни борлиги эса уни қизиқтирармиди?! Ахир ўзимизнинг одамларимиз, ватандошларимизнинг соғлигини тиклашига кетадиган ортиқча харжлардан кимлардир фойда кўраётгани, ана шу беморларнинг хариди туфайлигина унга уч-тўрт сўм мукофот беришаётганини у яхши билади-ку!

Ўзимизнинг корхоналарда ишлаб чиқарилаётган дорини олсак, тадбиркорларимизга кўмаклашган, қолаверса, ҳамёнимизга ҳам зарар қилмаган бўлмаймизми? Шундай йўлни тутган айримларга қарата: «Суф-е сизга, чет элнинг хўрозқандига ўрганган дўхтирлар-э», дегинг келади. Мен каби кўплаб содда оналарнинг мурғак фарзандлари сизларга эрмак бўлибди-да! Нафс қурсин-а! Қайсидир компаниянинг даромадини ошириш йўлида бир гўдакка турли-туман уколу дорилар қилиш, арзимаган фойдангиз эвазига уларни пала-партиш даволаш ичган қасамингизга тўғри келадими?!

Ушбу мақолани ёзишда гап эгасини топади йўсинда иш тутдик. Кузатувимиз қаҳрамонлари исми шарифларини келтирмадик. Чунки улар битта емас... Бошқалар ҳам хулоса чиқариб олсин, дедик. Ойни этак билан яшириб бўлмайди, ахир. Қолаверса, четдан келтирилаётган дори-дармонларни юртимизда сотилишига рухсат бераётганлар, соҳага масъул шахслар наҳотки бундан бехабар? Тегирмончини гардсиз кўрган одам борми? Бу аҳволни жимгина кузатиш ёки эшитибэшитмасликка олиш мумкинми?!