Алвидо Юртимнинг Халки

Мусофирлик азобидан қийналиб юрган ҳамюртларимизни ,ҳориж давлатларида иш қидириб, алданиб қолиш оқибатида фоҳишаликка мажбурланаётган аёлларимизни ,паҳта далаларида совиқларда жунжикиб,
паҳта тераётган мактаб ўқувчиларини ҳаёти каби бир нечта дил огриқли ҳодисаларни кўриб,эшитиб қалбим эзилаверади,эзилаверади...


Осмон юзин булут қоплаб,
Қуёш пинҳон бўлган сайин,
Зулмат ичра чора топмай.
Айтинг, қандай йиғламайин?

Дайдиб юрса аёллар гоҳ,
Юрт эрлари бўгач "майин",
Йитса мардлик, номус, ҳаё,
Айтинг, қандай йиғламайин?

Даврин сурса тахт узра тек,
Ҳақ душмани шайтон, лаин,
Пахта терган мурғаклардек,
Айтинг. қандай йиғламайин?

Қанча-қанча ниҳон сирлар
Ошкор бўлмай қолмиш, тайин.
Қон йиғласа мусофирлар,
Айтинг, қандай йиғламайин?

Шоир, арбоб илинж излаб,
Ёлғонларга созлар найин.
Шундай пайтда нажот истаб,
Айтинг, қандай йиғламайин?

Қурқоқликнинг қаттол ваҳми
Ҳар юракда қурганда ин,
Топталганда инсон қадри,
Айтинг, қандай йиғламайин?

Каламушдай кемирса гар,
Қалбни буткул хусумат, кин.
Қолса меҳр зор, дарбадар,
Айтинг, қандай йиғламайин?

Қондошликка етса путур,
Инсоф, иймон олганда тин,
Поймол бўлса қадру ғурур,
Айтинг, қандай йиғламайин?

Зулмат ичра қолса ёғду,
Айрилмаса ёлғону чин,
Ёруғ кунни айлаб орзу,
Айтинг, қандай йиғламайин?..

Юрагимни эзганда дард,
Нечун юрак тиғламайин?
Аллоҳимдан сўраб мадад,
Айтинг, қандай йиғламайин?

Жахонабегим