Оддий велосипед миниб ўтган дадам... (1)

5-6 ёшимдаги хотиралар..
Бу дунёда энг ақлли  ягона инсон бўлса ҳам у менинг отам экан.

У кишини бирламчи эслай олганим шуки менинг назаримда жуда бой эдилар. Уйда доим Ленин бобонинг сурати тушган қизил пуллар сочилиб ётарди. Лекин бу пуллар дадамнинг пуллари эмас балки давлатнинг пуллари эди.

Дадам ва онажоним доим ҳар куни кунлик ҳисоботларни тайёрлар эдилар. 

Эртанги кунда эса пулларни давлатга топширар эдилар.

Биз фарзандлар учун алоҳида ёки ўзлари учун алоҳида пул жамғармалари бўлмаган.

Пулларни кўриб биз жуда бой эканмиз деб ўйлардим...

Биринчи бор ўғирлик қилганим ҳам ўша вақтда содир бўлганди. Бу менинг биринчи ва охирги ўғрилигим бўлганди.

Бир дона Ленин бобонинг расмини олиб кўчага мақтанишга чиққандим.

Ажабо, кўчада менинг қўлимдаги пулни кўриб СССР бригадири менга биринчи навбатда 1 сўмлик қоғоз пул эвазига Ленин бобонинг расми тушган пулни алмаштиришимни истаганди.

Мен эса истамагандим.

Ундан сўнг 3 ва 5 сўмлик СССР пулларига алмаштиришни истаганди. Лекин мен яна истамагандим.

Бундан эса ҳозирга қадар жуда хурсанд бўлиб келмоқдаман.

Чунки мен ўша вақтда дадамни сотмаган эканман. Унинг бир тийинига хиёнат қилмаган эканман.

Онам мени излаб кўчага чиқиб бу ҳолатнинг гувоҳи бўлганди.

Шунда онам менга нисбатан бир гап айтганди. -"Болам ўғирлик қилсанг кейин бу учун бутун умр уятда қоласан, яхшиси қарз ол, уни узиш мумкин аммо ўғирликдаги пулни узиб бўлмайди"

Нақадар ақлли сўзлар экан...

Ҳалол луқмадан бошқасини емаган отам шунчалар пул топа олсаларда доим ота оналарига қарашдилар ва бир умр оддий велосипед миндилар. У кишининг укаларининг барчасида машина ва бошқалари бўлди. Аммо, дадам доим оддий велосипедга зор бўлиб ўтдилар.

Мени эса махсус ўқишим учун жонларини жабборга ҳам бердилар.

Кечқурунлари геометрияни кечга қадар ўргатган отам аслида геометриянинг нима эканлигини билмаганлигини эндигина билдим...

Лекин мени ўша даврда "гений" қилиб улгурган эдилар.

Барча ёшлар каби мен ҳам 18 ёшим атрофимда бир қизни севиб қолган эдим.

Гапларимни ухлаб турган дадамнинг  ёнида айтгандим.

Дадам ухлаган десам, гарчи ухламаган эканлар...

У киши барчасини эшитган ва билган эканлар.

Эртанги кунда мени хом ғишт қуйишга мажбур қилган отамдан нафратлангандим...

Давоми бор

Мистер Қалампир.