Клеопатра (клепать)
Олдин айтиб ўтганимдек, Машанинг кўнглини оғритадиган омиллардан бири-бу унинг яшаётган хонасига қўшни хоналарда яшовчи арақхўр хотинларнинг келишиб майҳўрлик қилишлари эди.
Маша онасининг кейинчалик "алкаш"га айланиб қолаётганлигини ҳис этар ва ич ичидан эзиларди.Бир неча бор онасини ароқ ичмасликка чақирганига гувоҳ бўлганман. Чунки баракларда паст овозда гапирила ҳам бошқаларга эшитилиши аниқ эди. Маша онасининг бу каби аёллар билан сурункали тарзда ичишига қаршилик кўрсатар, онаси эса гарчи яхши, оққўнгил аёл бўлсада ароқхўрлик дея аталган бу ботқоқликдан сира чиқа олмасди. Бунга икки сабаб бор эди.
1. Ҳаётда қийналиб қолганлиги. Аниқроғи, суянчиқ эрнинг йўқлиги. Аммо шуни эътиборга олиш керакки, унинг эрсираб ёмон йўлга кириб кетганлигини ҳақида гап бўлмаган..
2. Ароқхўр аёллардан бирининг (Клеопатра) таъсир доирасидан чиқа олмаганидир.
Машанинг ҳаётига салбий таъсир кўрсатаётган бу аёл ким эди аслида?
Бу аёл ҳақида бирор бир яхши таассуротни эслай олмайман.
Бу аёлнинг икки эрдан топган икки ўғли ва турмушга чиқмаган ароқхўр аммо доно бир опасидан иборат оиласи бор эди холос.
Клеопатра икки ўғлини тарбилашни эсидан чиқармасди.
Болалари учун алоҳида хоналар ажратиб уларга ҳаттоки ноутбук компьютерлари ҳам олиб берган эди.
Хоналарини доимо озода тутарди.
Икки ўғли эса меҳрсиз худбин бўлиб ўсардилар.
Икки ўғли учун албатта маблағларни етказиб беришда таниш эркакларидан фойдаланарди.
Сурункали ичишлар, оилага бегона эркакларнинг келишлари ва даврадаги майхўрликларга шу икки ўғли доимо гувоҳ бўларди.
Унинг аҳлоқсиз аёллардан фарқи шунда эдики, жинсий алоқа учун уйга эркак етаклаб келмасди. Аммо шу эркакларга нозу жилва қилиб уларнинг чўнтакларидаги бор пулларига бўккунга қадар биргалашиб ичишишарди.
Шу хонага ҳам Маша келиб бу ёлнинг икки ўғли билан дўстона муносабат ўрнатган эди. Барча ҳодисалар ҳам Машанинг кўз ўнгида содир бўларди.
Машанинг бу икки ўғилдан фарқи шунда эдики, атрофида содир бўлаётган ҳолатларга кўз юммас ва ўз эътирозларини билдирарди.
Икки ўғлонга эса барибир эди.
Бу аёл ўзини Клеопатра дея аталишини жуда хуш кўрарди ва бошқалардан ҳам шундай дея аташни "талаб" қилиб қоларди.
Бир неча бор шу аёлдан ўзининг баракнинг маликаси эканлиги ва унинг сўзи бутун барак учун қонун эканлигини айтганини эшитганман.
Дарҳақиқат баракнинг мутлоқ хўжайинлиги учун чемпионат мусобаси давом этарди. Бу дўстона мусобақа эмасди. Бу бир бирига мағзава тўкиш ва ўз ҳукмини юқори ушлаб туриш мусобақаси эди.
Аниқроғи атрофига мулозамат кўрсатадиган ва ундаги йўқ обрўни бор дея дегувчи кишиларни тўплаш мусобақаси эди.
Лекин, унинг ҳақиқий Клеопатрадек аслзода эмаслигини ҳисобга олиб, мен уни "Клепать" дея атардим.
Рус тилидаги бу сўзнинг маъноси "чега"дир, яъни михпарчин бўлиб, бу аёл учун ушбу лақаб ғоят мос эди.
Чунки қурилишда ёғочни бир бирига бирлаштириб маҳкамлашга ишлатиладиган чегадек бу аёл ҳам бошқаларни ўзига шундай маҳкам "илдириб" олардики, кейинчалик ўз таъсир доирасига киритиб ҳоҳлаганча ноғорасига ўйнатарди.
Машанинг онасининг иқтисодий ночорлигини ҳисобга олсак, Клеопатранинг ҳар бир гапини рост ёки ёлғон бўлишидан қатъий назар маъқуллаб турадиган, бошқаларнинг гапларини унга етказиб беришда "соттихон" вазифасида қолганди. Клеопатра албатта бундай қулни қўлидан чиқариб юборишни ҳоҳламасди.
Клеопатра баракдаги аёллар тугул эркакларни ҳам ўз ҳоларига тинч қўймас, уларга доим суйкалиши янгилик эмасди.
Баракда яна бир хонадон бўлиб унда расмий эру хотин истиқомат қилишарди ва ушбу хонадон соҳибаси Клеопатрага қарши фикр билдиришда ўзига куч топа оларди.
Шаддодлик борасида Клеопатрага тенг рақиб эди. Бу аёл ҳам ичкиликка ошно бўлиб, Клеопатрадан фарқли ўлароқ бошқаларнинг ҳаётига аралашмас ва доимо давлат корхоналарининг бирида ишлаб келганди.
Бу икки аёл орасидаги ўзаро рақобат баракдаги бошқа оилаларга ҳам таъсир кўрсатмасдан қолмасди албатта. Икки қўчқорнинг боши бир қозонда қайнамайди дейилсада, мажбурлик туфайли бу икки калла мазза қилиб вижир вижир вилиб биргалашиб қайнарди. Қайнаганда ҳам жуда катта жанжаллар билан қайнарди.
Клеопатра ўз кучини кўрсатиб қўйиш учун малай тарафдорларни атрофига йиғиш ҳаракатида бўлиб, ўз таъсир доирасига кирита олган кишиларга рақобатдаги иккинчи "Клеопатра" билан алоқани буткул узиш мажбуриятини юкларди.
Хоналардаги ўзаро жанжаллар ва ҳақоратлар Машанинг ёш қалбида жароҳат изларини муҳрлаётган эди. айниқса Клеопатранинг ошиб тушадиган қилиқларидан бўлмиш уялмасдан даврадаги эркакларга суйкалиши, ажабланарлиси, эркакларнинг бирининг тиззасидан туриб иккинчисининг тиззасига "қўниши", кўз қоқишлари, эркакларни ўпиши ва шу баҳонада уларнинг мастлигидан фойдаланиб ичиш учун ароқлар ундириши ёш қизнинг ҳаётга бўлган нафратини кучайтирарди.
Мен эса инсон ҳаётдан нафратланса у ҳолда келажакда яхши инсон бўлиб чиқиши шубҳа остига қолади деб ҳисоблардим ва бу тушунча миямга келганида қўрқиб кетардим.
Маша доим онасини шу аёллардан узоқда тутишга минг уринмасин бир натижа чиқмади.
Ёш боланинг етган ақлига шу аёлларнинг жиғилдонлари етди холос!
Ўлганнинг устига тепгандек, Машанинг келинойиси эри бўлатуриб бу хонага эски танишларидан бўлмиш йигит ва қизларни меҳмонга бошлаб келарди. Эрини бир тийинга олмайдиган бу ароқхўр хонимчанинг танишлари бир неча йигитлар ва озроқ сонли қизлардан иборат эди.
Уларнинг яшаш шароити эслида меҳмон кутишларига имкон бермасада, ўзбеклардан кўра меҳмондорчиликни жуда "боплашарди".
Фарқи шуки, ўзбек хонадонларида меҳмон кутишда дастурхон безатилиши яхши бўлса, бу хонадонда фақатгина столда алкоголик ичимликлар ва кейинчалик бўшаб қолган бутилкалар дастурхонинг кўркига кўрк қўшарди.
Машанинг келинойисини ҳақли равишда Клеопатранинг "қизи" яъни ўринбосари дейиш мумкин эди. Чунки бу икки аёл характер жиҳатидан бир бирларига жуда мос эдилар.
Уларнинг ҳар иккиласини инсон танасидаги гижжага (паразит) қиёсласак 100 % тўғри бўларди.
Бировларнинг ҳисобидан кайфу сафо уларнинг касбига айланиб қолган ва Машанинг онаси бу келинни айнан келин эканлигини учун ҳурмат қиларди. Уни кетиб қолишидан қўрқарди. Менга эса бу ҳолат кулгули туюлсада рус оламининг бир бўлак қисмида шундай эди.
Эркакларнинг аёлларга нисбатан ғаламисроқ яширинча қарашларини билардиму аммо аёлларнинг.....
Кунлардан бир кун маст бўлиб қолган Клеопатра бир неча бегуноҳ қўшни эркакларни, аниқроғи бу юртга пул ишлаш илинжида келган мардикорларни милицияга (полиция) топшириб юборди.
Негами?
Буниси ҳали ҳолваси экан....
(давоми бор)
Комментариев нет:
Отправить комментарий