Ёдгор Обид ижодидан

БОБУР

Таним - тупроқ,
Юрагим - тош,
Руҳ - туғён.
Ўкинчларим шамол,
Армонлар қуюн.
Лаҳадда ҳам тинч қўймади бу замон...
Қиличимни келтир, ўғлим Ҳумоюн!

Тақдир ҳукми бўлса шоҳлик - не гуноҳ.
Беш юз йилким дашном ёғар қўймайин.
Фарёдга айланди мен ётган тупроқ...
Қиличимни келтир, ўғлим Ҳумоюн!

Мен сиғмаган юртнинг ҳоли не бўлди,
Бориб қайбир тилда кўнгил сўройин.
Наҳот қаддин букмаган эл букулди...
Қиличимни келтир, ўғлим Ҳумоюн!



Мезон бўлиб ҳаволанди номус - ор,
Ёт тупроқда энди қандоқ ётайин.
Туроннинг на ҳадди, на хати бор....
Қиличимни келтир, ўғлим Ҳумоюн!

Оғринар ҳаттоки сарғайган сўнгак,
Жаҳаннам ўтида, майли, куёйин.
Сўнгги ишончимга келтирмайин шак -
Қиличимни келтир, ўғлим Ҳумоюн!