Раввин Борух Абрамчаев (ўртада) Бухоро синагогида никоҳ ўқимоқда

www.milliyburch.com

Ўзбекистонда яҳудийлар ўз диний ва миллий қадриятларига амал қилиш учун барча имкониятларга эга. Бу ҳақда, Vatandosh.Uz хабарига кўра, Тошкент раввини Борух Абрамчаев маълум қилган.

«Яҳудийлар жамияти мусулмонлар, христианлар ва бошқа конфессиялар қатори ўзларининг анъанавий Пейсах, Пурим, Ханук байрамларини нишонлашади, яҳудий анъаналари бўйича сўйилган қорамол гўштини тановул қилишади», – деди шаҳар раввини. Абрамчаевнинг
қўшимча қилишича, Ўзбекистонда виждон эркинлиги таъминланган.

«Шуни алоҳида қайд этиш керакки, Ўзбекистон ҳудудида 130дан ортиқ миллат ва элатлар елкама-елка тинчлик-тотувликда истиқомат қилишади. Ўзбекистон Конституцияси қабул қилинганининг 21 йиллиги муносабати билан ватандошларимни табриклайман», – дейди Тошкент раввини Борух Абрамчаев.

Борух Абрамчаев 1971 йии Тошкентда таваллуд топган бўлиб, 1974 йили ота-онаси билан Исроилга кўчиб ўтади. 2012 йил октябрь ойида Ўзбекистон адлия вазири уни Тошкент синагогларидан бирига раввин сифатида аккредитациядан ўтказган.

Eajc.org сайти маълумотларига кўра, ҳозирги кунда Ўзбекистонда 9 мингга яқин яҳудий борлиги тахмин қилинади, улардан 3 минг нафари Бухоро яҳудийларидир. Яҳудийларнинг энг катта ҳамжамияти (тахминан 5 минг киши) Тошкентда.

2010 йил маълумотларига кўра, Ўзбекистонда жами 10та синагог бўлиб, Тошкентда учта, Бухоро ва Самарқандда иккитадан, Қўқон, Фарғона, Марғилон ва Андижонда битта.